УИХ-ын Ёс зүй дэгийн байнгын хороо энэ сарын 9-нд хуралдаж, УИХ-ын гишүүн Х.Баттулга, М.Нарантуяа нарт хариуцлага тооцох асуудлыг хэлэлцэн шийдвэрлэхээр болжээ.
УИХ-ын гишүүн Х.Баттулга нь намрын чуулганы 32 удаагийн хуралдаанаас 26-д нь суугаагүй, М.Нарантуяа гишүүн бусдыг доромжилсон гэх асуудлаар хариуцлага тооцуулахаар болсон.
Гэхдээ УИХ-ын гишүүнд хариуцлага тооцох тухай зохицуулалтад сануулах, уучлалт гуйх, зургаан сар хүртэл цалингийн 20 хувь хасах гэсэн шийтгэл ногдуулахаар туссан. Тодруулж хэлбэл, шийтгэл гэж хэлэхэд бэрх зохицуулалтыг хуульд тусгасан нь УИХ-ын гишүүн нь иргэнээсээ илүү давуу эрх эдэлж байна гэж хэлж болно.
Хэрвээ жирийн иргэн ажлаа тасалбал халагддаг, бусдыг сошиалд доромжилсон үндэслэлээр саатуулагддаг.
Иймээс УИХ-ын гишүүнийн ёс зүйн зөрчилд ногдуулдаг хариуцлагыг чангатгахгүй бол толгойг нь илсэн шийтгэл болж буухаар байгаа юм.
Ер нь УИХ-д чуулган, байнгын хорооны хуралдаа суудаггүй, ажлын хэсгийн хуралдаанд оролцдоггүй, хуулийн төсөл санаачилдаггүй зэрэг гишүүд бий. Дээр нь худлаа ярина, дэгсдүүлнэ, бусдыг загнах зандрах, гүтгэх зэргээр ёс зүйн зөрчил гаргах тохиолдлууд ч олон. Энэ бүрт хүлээлгэх хариуцлага чанга, наанадаж УИХ-ын гишүүнээс эргүүлэн татдаг байх зохицуулалт суулгахгүй бол парламентад ёс зүй өндөртэй гишүүд нэр дэвшин сонгогдох магадлал улам л бүрдгэрч байна.
