OPEC-ийн Өргөтгөсөн бүлэг V сарын олборлолтоо гурав дахин нэмэгдүүлнэ
OPEC-ийн Өргөтгөсөн бүлэг газрын тосны олборлолтоо төлөвлөснөөс хурдан нэмэгдүүлэх шийдвэр гаргасны дараа газрын тосны үнэ 2022 оноос хойших хамгийн өндөр дүнгээр буурлаа. Пүрэв гарагийн арилжаагаар 6.6 хувиар буурсан WTI төрлийн газрын тос баррель нь 67 ам.доллароор арилжаалагдаж байгаа бол брент төрлийн газрын тос баррель нь 70 орчим ам.доллароор арилжаалагдаж байна.
Дональд Трампын тарифын бодлого хэрэгжиж эхэлснээс хэдхэн цагийн дараа OPEC-ийн Өргөтгөсөн бүлэг тавдугаар сарын олборлолтоо гурав дахин нэмэгдүүлэх шийдвэр гаргалаа.
Газрын тосны үнэ буурснаар Төв банкнууд инфляцыг бууруулахад дөхөм болох ч салбарын компаниуд сүүлийн үеийн таамаглалаа бууруулах шаардлага бий болоод байна.
Үүнээс гадна Дональд Трампын тарифаас үүдэн таваарын зах зээлийн ихэнх түүхий эдийн ханш улаан бүсэд шилжинэ гэдгийг “Citigroup”-ийн шинжээч Макс Лэйтон онцоллоо. Тухайлбал: ирэх долоо хоногуудад зэсийн үнэ 8-10 орчим хувиар буурч магадгүй гэдгийг тэрбээр тодотгожээ.
Тарифын арга хэмжээ хэрэгжиж эхэлсний дараа буюу пүрэв гарагийн арилжаагаар зэсийн үнэ 3.4 хувиар буурсан хөдөлгөөнтэй байна. Тарифын бодлого таваарын зах зээл дэх түүхий эдүүдийн эрэлтэд сөргөөр нөлөөлж магадгүй гэх хүлээлт зах зээлд давамгайлж байна.
