АНУ-ын ерөнхийлөгч Дональд Трамп тангараг өргөснийхөө дараа Хятадын бараа бүтээгдэхүүнд 20 хувийн импортын татвар оноох шийдвэр гаргаж байв.
Лхагва гарагт тэр дэлхийн бараг бүх улсын эсрэг худалдааны дайн зарлахдаа Хятадын импортод дахин 34 хувийн татвар нэмж, нийтдээ 54 хувийн татвартай болгожээ.
Тэгвэл энэ арга хэмжээний үр дүнд зах зээлийн үнэ нь хамгийн өндөр өсөх бүтээгдэхүүнүүдийн тоонд Apple компанийн iPhone багтаж байна.
Apple жил бүр 200 сая гаруй iPhone үйлдвэрлэдэг бөгөөд үүний ихэнх нь Хятадад үйлдвэрлэгддэг.
Хэрвээ Трампын зарласан татварын зардлыг Apple компани худалдан авагчдадаа үүрүүлэхээр шийдвэл нэгж iPhone-ий үнэ 43 хувиар өсөхөөр байгааг судлаачид өчигдөр мэдээлжээ.
Тухайлбал Wedbush Securities компанийн шинжээч Даниэл Айвз энэ бүтээгдэхүүний үнэ дээд тал нь $2,300 хүрэх тооцоо гаргасан байна.
iPhone гар утасны сүүлийн загварын хамгийн үнэтэй хувилбар одоо $1,599 үнэтэй зарагдаж байгаа юм.
Хамгийн хямд загвар нь болох iPhone 16e загварын үнэ $600-аас $858 хүрч өсөх тооцоо гарчээ.
Трампын мэдэгдлийн маргааш буюу Пүрэв гарагт Apple компанийн хувьцааны ханш 9 хувиар унасан юм.
Трамп өмнөх засаг захиргааныхаа үед Хятадын бараанд импортын татвар оноохдоо iPhone-ийг үүнээс хэлтрүүлж байжээ.
Харин энэ удаа тэр хэнийг ч харж үзэлгүй нийтээр нь хамруулсан юм.
Гэхдээ зарим ажиглагчид Трампыг ийм байдалд хүргэлгүй Хятадын талтай ямар нэг тохиролцоо хийнэ гэж үзэж байна.
“Хэрвээ хэн нэгэн онцгой эрх эдлэх бол тэр нь Apple байх болно. Энэ нь зах зээлийг тайвшруулах Трампын арга болж магадгүй. Гэхдээ Трамп 2.0 нь Трамп 1.0 хувилбараасаа хамаагүй өөр болсон мэт харагдаж байгаа тул хөрөнгө оруулагчид их зүйлд найдах хэрэггүй юм” гэж CFRA Research компанийн шинжээч Ангело Зино бичжээ.
Эх сурвалж: Reuters
