Энэ сарын 23-нд Боловсролын сайд анхны хуралдаанаа хийж төрийн өмчийн ерөнхий боловсролын сургуулийн удирдлага, багшийг сэлгэн ажиллуулна гэж мэдээлж байв. Тэрбээр уг асуудлаар өнөөдөр тайлбар өглөө.
Боловсролын сайд П.Наранбаяр "Төрийн өмчийн ерөнхий боловсролын сургуулийн удирдлага, багшийг сэлгэн ажиллуулах бодлогын талаар хэлье. Энэ бол зөвхөн хамран сургах тойрог дотор нь, зөвхөн аймгийн төв, нийслэлийн хэмжээнд явагдана.
Удирдлага, багш нарын 20 хүртэл хувийг эхний жилд сэлгэнэ. Сэлгээнд хамрагдахыг өөртэй нь ярилцаж тохиролцоно. Сэлгээнд хамрагдах нь үнэлгээ, мэргэжлийн зэргээ ахиулахад эерэг нөлөө үзүүлнэ. Хөгжингүй орнуудад ингэж сэлгэн ажиллуулах нь ердийн үзэгдэл юм.
Нэг захирал, нэг багшийг нэг сургуульд олон жил “хадаж” ажиллуулахад шинэ юм гарахаа больчихдог гэм бий. Багшийн хөгжилд ч зарим талаар сөрөг нөлөөтэйн дээр тэргүүн сайн туршлага, арга барил, мэдлэг нэг сургуулийн хүрээнд хашигдчих гээд байдаг. Мөн нэг сургуулийг олон жил удирдсан захирлыг тойрсон ашиг сонирхлын зөрчил ч гүнзгийрдэг.
Багш нарынхаа дуу хоолойг бид сонсож ажиллана. Хамтдаа хийгээд үзье. Нүсэр бус төсөр байдлаар шийдье" гэв.
Багш, ажиллагсдын эрүүл мэндийг дэмжих зардлыг 2024 оны тавдугаар сард бүрэн санхүүжүүлсэн бөгөөд энэхүү зардалд нийт ЕБС-уудад 3.7 тэрбум, нийт Сургуулийн Өмнөх Боловсролын Байгууллагуудад 1.9 тэрбум төгрөг зарцуулж байгаа аж.
