|
Шинэ мэдээ

Тавантолгойн ордын хөрөнгө оруулалтын гэрээ “хорлон сүйтгэх ажиллагаа” байсан уу?

Ерөнхий сайд асан М.Энхсайханыг “хорлон сүйтгэх үйл ажиллагаа явуулсан” хэрэгт яллагдагчаар татжээ. Сар орчмын өмнө түүнийг өмнө шалгаж байсан гэмт хэргийн зүйлчлэлийг өөрчилсөн байна. Эрүүгийн хуулийн 19.6-д “хорлон сүйтгэх” гэмт хэргийг “Үндэсний аюулгүй байдал, батлан хамгаалах, эдийн засгийн хүчин чадлыг сулруулах зорилгоор барилга байгууламж, мэдээлэл холбооны хэрэгсэл, үндэсний шинж чанартай мэдээллийн сан, хүн амын амьдралыг хангах обьектыг сүйтгэсэн, гэмтээсэн, үйл ажиллагааг нь доголдуулсан, хүн, амьтан, ургамлын гоц халдварт өвчин тараасан бол 1-5 жил хүртэл хугацаагаар хорих ял шийтгэнэ”, “Энэ хэргийн улмаас олон хүний амь бие, эрүүл мэнд, эд хөрөнгөд ноцтой хохирол учирсан бол, эсвэл зохион байгуулалттай гэмт бүлэг үйлдсэн бол 2-20 жил хүртэл хугацаагаар, эсвэл бүх насаар нь хорьж шийтгэнэ” гэсэн байна.

“Хорлон сүйтгэх” гэдэг нь бидний мэддэгчлэн террорист бүлэглэлүүдийн үйлддэг гэмт хэрэг. Товчоор хэлбэл Ерөнхий сайд М.Энхсайханыг үндэсний аюулгүй байдлын эсрэг террорист үйл ажиллагаа явуулсан хэрэгт сэжигтнээр тооцож, яллагдагчаар татсан байна.

Мэдэж байгаачлан түүнийг өнгөрөгч оны зургадугаар сард АТГ-аас баривчлан саатуулж, “Тавантолгойн ордыг ашиглах хөрөнгө оруулалтын гэрээг боловсруулах явцдаа бусдад хууль бусаар давуу байдал олгосон” хэмээн сэжигтнээр тооцож, яллагдагчаар татсан тухай мэдээлсэн билээ. АТГ-ын Мөрдөн шалгах хэлтсийн дарга Э.Идэрцог тухайн үед “М.Энхсайхан нь Шадар сайдаар ажиллаж байхдаа Тавантолгойн хөрөнгө оруулалтын гэрээг боловсруулах Засгийн газрын ажлын хэсгийг ахалж байсан нь уг хэрэгт сэжигтнээр татах үндэслэл болсон” хэмээн тайлбарласан байна. Өөрөөр хэлбэл түүний хийсэн гэмт үйлдэл бус, эрхэлж байсан ажил, албан тушаал нь гэмт хэрэгт сэжиглэх үндэслэл болсон гэсэн үг.

Ерөнхий сайд асан М.Энхсайханыг анх 2018 оны гуравдугаар сард АТГ-аас дуудаж, эрүүгийн хэрэгт холбогдуулан байцаалт авсан юм байна. Үүнээс хойш жил гаруй явуулсан мөрдөн шалгах ажиллагааны үр дүнд өнгөрөгч оны зургадугаар сард эрүүгийн хэрэг үүсгэж, яллагдагчаар татсан тухай мэдээлжээ.

Харин одоогоос сарын өмнө түүний шалгагдаж байсан зүйл ангийг өөрчилж, Эрүүгийн хуулийн 19.6 буюу “хорлон сүйтгэх ажиллагаа явуулсан” хэрэгт яллагдагчаар татсан байна. Товчхондоо Тавантолгойн ордын хөрөнгө оруулалтын гэрээг болвсруулсан явдал нь “Үндэсний аюулгүй байдал, тусгаар тогтнол болон батлах хамгаалах, эдийн засгийн хүчин чадлыг сулруулах гэсэн хорлон сүйтгэх ажиллагаа мөн” гэж хуулийнхан үзсэн байна. Бодоход өмнө шалгаж байсан гэмт хэргийн нотлох баримт, хангалттай үндэслэл гарч ирээгүй бололтой.

Манай эрүүгийнхний /хуулийнхны/ хэлэх дуртай нэг үг байдаг даа. Хүн нь байвал хэрэг нь олдоно гэж. Ерөнхий сайд асан М.Энхсайханд тэр нь ирсэн бололтой. Ядаж л удахгүй болох УИХ-ын сонгуулийг дуустал М.Энхсайхан гэдэг хүнийг "далд хийх" үүргийг манай номер нэг, хоёрдугаараас тэдэнд өгсөн бололтой. Тавантолгойн ордын хөрөнгө оруулалтын гэрээг гацааснаа одоо хүртэл "гавъяа" гэж бодож явдаг хүн ч бас бий.

Б.Заяа

Эх сурвалж: inews.mn